L L I T E R A T U R A
12 d' Marzu de 2010

POETES ASTURIANOS D’ENTRESIEGLOS (XIX-XX) MANÍN DE LA LLOSA

Función benéfica

XOSÉ LLUÍS CAMPAL

Los afoguinos de toa triba que traxo l’esbarrumbu del Frenti del Norte na Guerra Civil buscóse amenorgalos con iniciatives caritatibles. Una d’eses funciones, a beneficiu de los neñinos más probes de la villa, anúnciala Gabino Muñiz G.-Robés, que garró l’alcuñu de Manín de la Llosa, nes simplayes octavilles de ‘El sábado nel Valdés’ (‘Boletín de Avilés’, 14-XI-1939).

Zapatilles y madreñes
pa los probes rapacinos
que hoy anden descalcinos
pe les calles d’Avilés:
Han teneles a docenes
pos les xentes y a montones
han de dir a les fonciones
el sábado nel ‘Valdés’.
¿Qu’haberá de novedades?
Cantarinos gayasperos
per mozacos xaraneros,
corazones de anxelín.
En custión de caridades
no arreparen nel trabayo
sin facer causu al destayo
non cobrando ni un perrín.
Galán, Viso y Espolita
son cantadores xenuinos
per sos tangos argentinos,
asturianos y cañí.
Llira pura y esquesita
per so arte, so cadencia,
y l’estilo na so cencia,
qu’é pa ellos baladí.
(...) N’esta villa que tien fama
d’arrogante faltriquera
no haberá naide siquiera
que se niegue a tan güen fin.
Por exemplo, si a un se llama
pidiendoy que contribuya
con su pecuniaria ayuda
a calzar a un rapacín.
(...) Pe lu tanto, Dios mediante,
han quedar bien calzadinos
los rapazos más probinos
de la villa de Avilés.
Perque dinero abondante
ha salir de les fonciones
que la xente y a montones
dexe en ‘Palacio Valdés’.