ENTREVISTES
19 d' Agostu de 2011

HÉCTOR PÉREZ IGLESIAS
ESCRITOR

«En poesía nun faigo lo que me prestaría, sinon lo que puedo»

ENRIQUE CARBALLEIRA

AUTOR. Héctor Pérez Iglesias. / MARIO ROJAS

Héctor Pérez Iglesias (Llanera, 1978) ye’l nuevu ganador del premiu de creación lliteraria, Llorienzu Novo Mier, de l’Academia de la Llingua Asturiana. La obra ganadora, ‘La mano vacía’ preséntase como un poemariu que trata sobre’l pasu’l tiempu, esperiencies vivíes y paisaxes futuros. L’autor tamién cunta con dalgunos otros premios importantes, ente ellos el Fernán Coronas.

–Preséntenos ‘La mano vacía’.

–Diría que ye un poemariu nel que s’observa y reflexona sobre dellos aspeutos del pasu del tiempu, una mirada que se fai dende unu d’esos momentos de la vida que paecen claves pa facer recuentu de lo fecho y les espectatives de lo por venir; falo d’oportunidaes perdíes, y tamién de frustración y de la rabia que conlleva ésta munches veces.

–¿Atopamos una conexón con anteriores trabayos suyos?

–Hai una conexón clara, porque los temes siguen siendo básicamente los mesmos, anque tamién espero qu’haya evolución. De los llibros anteriores ‘L’amarga cazumbre’, ‘Como crecieres tu’ y ‘Lo peor del bon tiempu’ creo que tienen una unidá mui fuerte ente ellos, yo casi los veo como un solu llibru. Depués escribí ‘Aquella xente nunca sabía aú llevaben les carreteres xunta les que vivíen’, tovía inéditu, que sí creo que foi un esfuerzu por separame un poco de los llibros anteriores, principalmente nel tonu y les formes. Con esti vuelven tonos más cercanos a aquellos primeros, pero sí veo diferencies con ellos, por exemplu lo rural nun ta tan presente, y si aquellos yeren una especie de reflexón y crónica dende la infancia hasta la madurez, esti ta muncho más centráu nel presente.

–Supongo qu’habrá’l proyeutu d’espublizar el llibru por parte de l’Academia de la LLingua…

–Sí, na presentación falóse d’ello, pero tamién se comentó que l’Academia nun puede dir sacando tolo que tien pendiente cola rapidez que-y prestaría por cuestiones de recursos. Por exemplu’l llibru que ganó esti mesmu premiu l’añu pasáu, ‘Nos díes pensatibles’, de Ricardo Candás, tovía nun ta asoleyáu.

–¿Cree que cada nueva obra ye un pasu más nel procesu d’aprendizaxe?

–Siempre. D’aprendizaxe lliterariu pero sobre too d’aprendizaxe vital, porque cada obra supón una reflexón sobre les propies esperiencies y circunstancies nes que me va tocando andar pel día a día.

–¿Qué temes son los que más-y presten a la hora d’escribir poesía?

–Yá los comenté un poco enantes, porque tolos mios llibros xiren alrodiu d’esos cuatro o cinco temes. A la hora d’escribir nun ye tanto qu’haya temes que me presten más como qu’hai temes cásique m’obsesionen. Soi mui cosciente de les mios llimitaciones como escritor, en poesía nun faigo lo que me prestaría o lo que quiero, sinón lo que bonamente puedo.

–Ta avezáu a participar en dellos concursos. ¿Ye una bona forma de llegar al públicu y de ver asoleyáu un trabayu?

–Los concursos paécenme dalgo mui interesante y valioso pa lliteratures con ciertes llimitaciones como la nuesa, yá que como bien apuntes faciliten muncho’l dase a conocer y permite la difusión de la obra. Pero pa mi agora mesmo’l principal interés de los concursos ye que me sirven pa enfrentame d’un mou más oxetivu a eso no que ún lleva trabayando unu o dos años y nun tien la distancia suficiente pa valorar, válenme pa ver si lo que s’escribe na intimidá y dende la intimidá puede llegar a interesar a dalguién más.

–Una de les sos publicaciones más recientes foi ‘Desinencies’, que recueye dellos rellatos. ¿Cómo lleva la so producción narrativa?

–Llevo muncho ensin escribir narrativa, el mio mou actual d’enfrentame a la escritura ye más afayadizu pa la poesía que pa la prosa, que requier otros tiempos y disposiciones que nun se m’arreglen anguaño. Pero sí que me prestaría volver escribir dalgo, seguramente rellatos, porque lo de la novela creo que me queda bastante grande.

–¿Qué tien en proyeutu?

–Sigo escribiendo dacuando en vez, ensin denguna idea o meta precisa, principalmente notes y apuntes a los que quiciabes dientro d’un tiempu intentaré dar cierta forma de ‘poemariu’ cuando vea que puede salir dalgo interesante d’ello.

–La crisis tamién se ta sintiendo nel mundu editorial. ¿Nel casu de la llingua asturiana tamién ye asina?

–Sí, sobre too nel ámbitu de la distribución: el fechu reciente del pieslle de llibreríes como Trabe, Alborá o Paraxuga son bona muestra d’esto. Ye una verdadera pena que desapaezcan llibreríes especializaes n’asturianu, yá que la lliteratura nesta llingua la mayoría de les veces nun ta dignamente representada en llibreríes más xeneralistes.

–Lo más difícil. ¿Podría apuntanos dalguna idea pa meyorar la situación del asturianu?

–Efeutivamente ye una cuestión de difícil rempuesta, porque ye un tema qu’abarca munchos aspeutos distintos. Yo, centrándome nel puntu de vista del escritor, diría qu’hai que siguir potenciando l’usu de la llingua asturiana cola total cosciencia de que ye una ferramienta tan bona y afayadiza como cualesquier otra llingua pa poder espresar la realidá complexa esterior y interior de los seres humanos. Pero soi cosciente de que, anguaño, lo más importante y decisivo ta nos ámbitos alministrativos y políticos, principalmente con una presencia digna y significativa del asturianu na enseñanza y, por supuestu, la oficialidá.