ENTREVISTES
22 d' Xunu de 2012

«El pasu’l tiempu marca muncho»
La poeta Ana Rosa Fernández espubliza ‘Los nomes de la lluvia

ENRIQUE CARBALLEIRA

AUTORA. Ana Rosa Fernández, poeta. /JUAN CARLOS ROMÁN

Suburbia Ediciones asoleya’l númberu 9 de la so colección de poesía ‘Males Tierres’. Trátase del volume ‘Los nomes de la lluvia’, poemariu d’Ana Rosa Fernández (Sotrondio, 1965). Anque nun tamos ante una autora novel, pues tien asoleyaos poemes en delles antoloxíes y algamó más d’un premiu lliterariu, sí ye una voz poco conocía nel panorama de la poesía asturiana.

‘Los nomes de la lluvia’ ye una muestra más de la calidá y fondura de la poesía fecha n’asturianu y más concretamente de la poesía fecha por muyeres en llingua asturiana. La obra asoléyase nuna edición ilustrada con semeyes d’Ana Jambrina Huete.

–¿Qué nomes tien la lluvia?

–Como ye davezu en poesía, son nomes que falen del gran tema del sentimientu, de desnudar l’alma. Pero nun ye dalgo premeditao, son poemes que van surdiendo, poco a poco, que vas guardando, van sedimentando. Sentimientos universales d’ausencia, amor y desamor...

–¿Aveza a cambiar de temática d’un poemariu a otru?

–Cada llibru ye distintu. El primeru qu’espublicé foi ‘El peso de la luz’ y alredor del títulu trato de recrear una atmósfera. Nesti últimu casu, tamíen creo que’l títulu marca munchu.

Murnia, tranquilidá, bonos recuerdos, mirar la lluvia tres de la ventana, dir faciéndose mayor... Tamién atopamos referencies clares a la Cuenca’l Nalón, que ye onde vivo.

–Tamos ante un volume que tá ilustráu con dalgunes semeyes, ¿quedó contenta col resultáu?

–Sí, la verdá ye que’l resultáu quedó perguapu. El llibru lleva doce semeyes, acompañando a dellos poemes, feches por Ana Jambrina Huete, que fixo un gran trabayu.

–El pasu’l tiempu tamién ye ún de los temes que más marca la evolución de la poesía.

–Totalmente, eso marca munchu. Otru de los llibros que tengo en marcha, en castellanu, tamién creo que tá definíu pol momentu nel que m’alcuentro, nel que ves que te prestaría aprovechar más esi tiempu que, munches veces, de xoven piérdese bastante.

–Resultó finalista en dellos concursos destacaos como’l Cálamo, Voces de Chamamé, Ateneo Xovellanos de Xixón... supongo que tendrá bona opinión de los certámenes.

–Representen nueves oportunidaes, que nun abonden. Oportunidaes pa espublizar dalgunes obres o, tamién hai que dicilo, de sacar una rentabilidá económica que nun sobra tampoco nestos tiempos.

–Falenos d’autores que sigue.

–Munchos asturianos, creo que tenemos un gran nivel, y dellos son bonos collacios, especialmente los de la Cuenca. Podría nomar a Xosé Lluis Campal, Ardines, Chechu García, Julio Arbesú, Javier Cellino, que m’ayudó munchu, y otros como Ángel González, Alberto Vega, González Ovies, García Martín y, mui especialmente, porque lu considero un maestru, Gamoneda.

–¿En qué momentu ve a la llingua asturiana?

–Creo que tamos nun momentu un pocu indetermináu, onde nun se sabe qué va pasar. Lo que tá claro ye que deberíamos siguir trabayando pola llingua, yo personalmente sigo esforzándome y tratando de meyorar como poetisa y narradora, con dalgunes obres novedoses nes que toi trabayando, como un rellatu xuvenil.

–¿En qué proyeutos trabayará nos prósimos meses?

–Amás del rellatu xuvenil, del que llevo unos cinco capítulos, sigo alantre con un nuevu poemariu en castellanu. Voi faciendo’l llabor ensin prisa, col oxetivu de finalu pa la seronda o final d’añu. Tamién tengo la idega de participar en dalgún taller de llectura, en Turón, y seguiré coles presentaciones de ‘Los nomes de la lluvia’ n’otros puntos d’Asturies.