ENTREVISTES 30 d'avientu de 2003


XUNE ELIPE
CANTANTE DE DIXEBRA

"Nacimos como grupu de direutu, que ye onde tenemos más intensidá"
«Qu’una banda cumpla diecisiete años faciendo rock, cantando en llingua
asturiana y cuntando les coses que nós cuntamos ye cuestión de resistencia»

FRANCISCO ALVAREZ / XIXON


Ensin grandes pretensiones, cuatro mozos de la comarca avilesina xuntáronse’l Día de Reis de 1987 pa regalase una sesión de música. Aquello yera la partida de nacimientu del grupu de rock más llonxevu y influyente de la musica n’asturianu. Dixebra va cumplir la prósima selmana diecisiete años de vida con traxe d’estrenu en forma d’un discu-llibru, ‘Cróniques d’un pueblu’, que recuenta la hestoria coleutiva vivida a los sones de la so música

. –¿Son diecisiete años d’esistencia o de resistencia?
–Más bien de resistencia. Cuando entames pienses que la cosa nun va dir más allá de tocar en cuatro chigres. Pero dempués, cuando vas algamando repercusión nun seutor de la mocedá asturiana, vien lo de date cola muria nes ñarres y pescancies que nesti país hai una infraestructura musical mínima. Qu’una banda cumpla diecisiete años faciendo rock, cantando en llingua asturiana y cuntando les coses que nós cuntamos ye cuestión de resistencia.

–Vosotros mesmos reconocéis qu’ entamasteis ensin pretensiones.
–Sí, nel primer ensayu xuntámonos pa pasalo bien. Creo que Dixebra llegó hasta güei porque en tou momentu fuimos conscientes de les nueses limitaciones. De mano práuticamente nun sabíemos tocar. Yo lo único que facía yera berrar como una oveya a la que taben corando y musicalmente podíemos tocar ska porque con cuatro notes sacabes pa un cantar, pero nun podíemos facer les mesmes coses qu’agora.

–La vuesa evolución musical nestos años foi espectacular.
–Al entamu teníemos munchu focicu; aquello yera’l punk n’estáu puro. Salíemos al escenariu, garrábemos l’estilu punk y llevábamoslu a les másimes consecuencies, porque la filosofía del punk yera ‘faítelo tu mesmu’ ensin qu’importe l’envoltoriu cuando tienes daqué que dicir. L’envoltoriu nun yera’l más afayadizu, pero tuvimos un ñiciu de conciencia visionaria al pensar que naquel momentu la música asturiana y Asturies necesitaben un grupu d’eses carauterístiques. Y, como nun había naide que lu montase, nun nos quedó más remediu que tirar palantre.

–¿Foi granible esi esfuerzu?
–Al menos agora la xente yá tien referentes en música, lliteratura, estudios filolóxicos y otros campos. La primer bandera d’Asturies que tuve, con quince años, la bordó mio ma, porque nun había banderes. Tuvimos que crear hasta les banderes.

–¿L’autoxestión ye una de les señes d’identidá del grupu?
–Sí, dende’l primer día. Nunca nun tuvimos mánager y trabayamos d’un mou autoxestionariu.

–Mesmamente facíeis les vueses camisetes nos primeros tiempos
–Sí. Les pegatines que distribuyíemos y les camisetes que facíemos les vendíemos nós mesmos. Los grupos que surden agora n’Asturies tán mal avezaos, porque nacen con ciertes infraestructures musicales: hai compañíes discográfiques, una rede de festivales de branu, oficines de managers que trabayen con grupos asturianos... Daquella nun había nada d’esto. Munchos de los conciertos colos que nos dimos a conocer yeren d’autoxestión pura y dura. Díbemos pa cualquier chiringu onde nos dexaren montar la batería y los ‘amplis’ pa facer un poco de ruiu. Pal conciertu de los diez años de Dixebra embarcámonos nun proyeutu con teatru, vidiu, una carpa y munchos collacios que costó más d’un millón de pesetes, puestes pol grupu a güevu.

–¿Sentísvos obreros de la música?
–Sí, tenemos callos nes manes non solo de tocar. Nesi conciertu de los diez años, a les siete de la tarde Javi y yo tábemos montando una plataforma de madera y otros taben descargando o adornando l’escenariu.

Un proyeutu plural

–¿El de Dixebra ye un proyeutu nacionaliegu?
–Identifíquennos como un grupu nacionaliegu radical siempre dende fuera, porque enxamás nos entrugaron a nós. Primi, por exemplu, militó munchos años n’organizaciones trotskistes y él defínese como trotskista, y Javi vien del mundu llibertariu y ye anarkoide; hai tamién xente que vien del socialismu y otros, como César y yo al principiu y Fernando y yo agora, venimos del mundu nacionaliegu d’izquierdes. Nós facemos la nuesa propuesta y dempués que caún piense lo que-y pete.

–De la qu’entamasteis cuntabéis ser el biltu d’un movimientu de rock asturianu qu’ anguañu nun esiste.
–Nes entrevistes que nos facíen siempre comentábemos que díbemos ser los primeros, pero que vendría otra xente que diba tocar meyor y qu’esto diba medrar. Dempués atopámonos con otra realidá. Caltuvimos encesa la llaparada del rock n’asturianu, pero... Agora hai un pequeñu movimientu, como queda recoyíu nel últimu Anuariu de la Música Asturiana de L’Aguañaz; hai delles bandes qu’entamen a trabayar, pero tienen que demostrar constancia. Al menos yá tienen referentes n’Asturies, como’l discu-llibru del rock n’asturianu ‘Saca-yos la llingua’, grupos como Dixebra y Avientu y el discu ‘L’asturianu muévese’, nel qu’apaecen bandes de fuera faciendo rock n’asturianu.

–Acabáis de presentar ‘Dixebra: Cróniques d’un pueblu’ y hai quien ve nello una despedida.
–Yá había xente que dicía que ‘Sube la marea’ yera la nuesa despedida y esi añu tocamos más que nunca. A principios d’añu vamos empezar a preparar la xira de 2004 y en marzu marchamos a tocar a Bélxica. Dempués de les navidaes vamos metenos a preparar un nuevu discu, pal que yá tenemos delles músiques, queremos repescar dalgunes de les lletres inédites qu’apaecen en ‘Cróniques d’un pueblu’ y vamos falar con dellos escritores pa preparar otres.

–Una promesa pendiente del grupu ye un discu en direutu.
–Sí, ye una de les coses que nos pide la xente. Amás, Dixebra nació como un grupu de direutu, que ye onde tenemos más


LA BANDA
Primer ensayu: 6 de xineru de 1987 (Castañeda, Corvera).
Debú en conciertu: Primeru de Mayu de 1987 (Pueblu d’Asturies, Xixón).
Primer formación: Manu Tamargo (baxu), Xosé Nel Riesgo (batería), César García ‘Maniegu’ (guitarra) y Xune Elipe (voz).
Formación d’anguañu: Isra Sánchez (batería y percusiones), Primi Abella (guitarres), Fernando Rubio (gaites), Javi Rodríguez (baxu), Xune Elipe (voz), Eladio Díaz (saxos), Agus Lara (trompeta) y Sergio Rodríguez (samplers y soníu en direutu).
Discografía: ‘Grie-ska’ (Fonoastur, 1990), ‘Asturies o trabayes’ (L’Aguañaz, 1993), ‘Apúntate a la llista’ (L’Aguañaz, 1995), ‘Dieron en duru’ (L’Aguañaz, 1997), ‘Glaya un país’ (L’Aguañaz, 2000), ‘Sube la marea’ (L’Aguañaz, 2002), ‘Dixebra: Cróniques d’un pueblu’ (discu-llibru, L’Aguañaz, 2003).
Actuaciones fuera d’Asturies: Galicia, Madrid, Euskadi, Cantabria, Aragón, Catalunya, Illes Balears, Bretaña y Occitania.
Autores de les lletres: Xandru Fernández, Quique Faes, Pablo Antón Marín Estrada, Boni Pérez, Toli Morilla, Manuel Asur, Andrés Solar, Pepín Quevedo, Manolo (Karne Antisocial), Ildefonso Vázquez, Juanjo López y Noemí Estrada.