| ENTREVISTES | 24 de xineru de 2006 |
PABLO TEXÓN / POETA
«Ta
visto qu’un bon escritor tien que ser un bon impostor»
L’autor de Felechosa, que presenta’l poemariu ‘Toles
siendes’, diz que «la pérdiga de falantes del asturianu
ye descomanada y nun paez que vaya aparar»
Xurde Fernández / Uvieu
Ta
acabante d’asoleyar el poemariu ‘Toles siendes’ (Ediciones
Trabe), col qu’algamó nel añu 2003 el Premiu de Poesía
Nené Losada Rico de L.luarca. Pablo Texón Castañón,
profesor d’Educación Secundaria nel Institutu Doctor Fleming
d’Uviéu, ye ensin dulda una de les voces cimeres de la tercer
xeneración del Surdimientu.
–¿Quién ye Pablo Texón?
–Si lo supiera igual nun me daba por escribir. Ye esa, la de conoceme
meyor, una de les escuses pa poner en claro lo que ta escuro, pa poner
nunes ringleres lo que ye informe. Namás con facer un xuegu nominalista
yá soi una contradicción: ‘Pablo’ ye ‘pequeñu’
y ‘Texón’, un ‘texu grande’.
–¿Qué pue atopar el llector nes páxines
de ‘Toles siendes’?
–Una goyada al mundu que quier ser ambiciosa y eshaustiva. Como
ha ser toa obra primera.
–¿Cuánto hai d’autobiografía
nel poemariu?
–Cuando estudies dalgo de teoría lliteraria sales mui convencíu
de la necesaria distinción ente autor y voz poética, y paez
que refugues otra visión del fechu lliterariu. Yo, col tiempu,
a pesar de too, me di cuenta de que nun yera a escribir sobre dalgo que
nun fora mío de dalguna manera. Sicasí, ta visto qu’un
bon escritor tien que ser un bon impostor.
| EL
PERSONAXE - Nació en Felechosa (Ayer) va 28 años. - Estudió Filoloxía Hispánica y ye especialista en Llingua Asturiana. - Llogró dellos premios lliterarios, como’l de la Tertulia El Garrapiellu, Fernández Lema, Cartes d’Amor, Art Nalón o Nené Losada Rico. - Ye militante de la Xunta pola Defensa de la Llingua Asturiana. |
–Nun soi a estremar eso. Lo universal ye aceptar la multiplicidá d’ámbitos locales que tien el mundu, son dos realidaes enforma complementaries. Los mayores provincianos que conocí teníen la concencia de ser universales, taben revestíos d’esi constructu mental. Yo quiero que la mio poesía sea universal –quién non– y nin desprecio nin mitifico’l sitiu onde nací. Supongo que nun ta mal el dichu de los ecoloxistes alemanes: piensa universal, actúa local.
–¿Qué ye lo meyor de too?
–Lo meyor de too ye aquello que t’enllena, que tien una cualidá totalizadora. Cuando nenos, anque poseemos una amplitú mental que perdemos colos años, tenemos, ‘visualmente’ si se quier, un espectru más pequeñu y ye más bono de consiguir esi absolutu. Por eso digo que tantes coses yeren lo meyor de too.
La lluz y la nueche
–¿Qué pasa pela nueche?
–La lluz (y la so ausencia) ye dalgo mui importante na mio percepción del mundu. Necesito muncho d’ello pa delles coses y pido mui poco pa otres. La nueche, la escuridá provoca en mi una actitú especial. Por eso pasen tantes coses... Paez que tengo dalgo asina como fotodeterminismu. ¿Esiste eso, ho?
–¿Queda dalgo poético n’Asturies?
–Nun sé, supongo que dalgo ente surrealista y decadentista.
–¿Cómo ve’l futuru del asturianu?
–Como militante en favor de la dignificación de la llingua tengo que me desixir ser optimista. Como observador de la realidá nun sé si lo pueo ser. L’autoconcencia llingüística ye cada vez mayor y la valoración sociollingüística cada vez meyor, pero la pérdiga de falantes ye descomanada y nun paez que vaya aparar. La meyora sociollingüística nun trai una ametida de los falantes y esi ye’l nuedu del asuntu.