NOTICIES 9 d'agostu de 2005


Ente caleyes, patios y boleres
La Tertulia Cultural El Garrapiellu cumple quince años de camín na defensa del patrimoniu etnográficu y llingüísticu d’Asturies


FRANCISCO ALVAREZ / XIXON


EL COLEUTIVU
- Fundación: xineru de 1990.
- Socios: cuasi un cientu (tien de socia d’honor a Mariquina La Galana, compañera artística d’Ánxel Nava).
- Presidenta: Gloria García.
- Concursos: entama dende 1991 el de cuentos curtios y dende 1992 el de redaición pa escolinos.
- Senderismu: recuperó y siñalizó la Ruta Xixón-Cuadonga y la Ruta del Románicu de Xixón. Los sos socios lleven a cau otres marches y escursiones na naturaleza.
- Etnografía: desarrolla llabores d’información, divulgación y denuncia contra’l desaniciu del patrimoniu asturianu.
- Deporte: fai en Xixón la Olimpiada Asturiana de Deportes Tradicionales y forma monitores p’averar los xuegos tradicionales a los colexos.


El primer acta que roblaron los sos fundadores, un día de xineru de 1990, dio la partida de nacimientu al coleutivu. Surdió va quince años, nel barriu xixonés del polígonu de Pumarín, col enfotu d’un puñáu de collacios que queríen trabayar en defensa de la identidá cultural asturiana. Anguaño, la Tertulia Cultural El Garrapiellu ye una lletra imprescindible nel abecedariu asturianista.

Gloria García, una d’aquelles socies fundadores, preside l’asociación dende 2001 (añu en que-y dio’l testigu Tino Lozano). Anque’l campu de trabayu de los garrapiellos ye ampliu y estremáu, reconoz que la Olimpiada Asturiana de Deportes Tradicionales se convirtió «nel platu fuerte del nuesu menú d’actividaes. Entamámosla al ver que nos pueblos, sobre too del Occidente, taba dándose un desaniciu de xuegos y deportes tradicionales, estaya na que somos el país con mayor bayura de tolos del Arcu Atlánticu. Baste dicir que llegamos a tener diecinueve modalidaes de bolos, dalgunes d’elles yá desapaecíes».

La novena edición de la Olimpiada tuvo llugar va diez díes nel xixonés Pueblu d’Asturies «con mui pocu sofitu institucional», denuncia Gloria, qu’añade que «vamos siguir faciéndola, pesie a que perdimos perres nos dos últimos años. Pa la décima edición queremos facer dalgo especial».

L’asociación pon l’acentu de los deportes autóctonos na mocedá cola organización d’una olimpiada infantil y la formación de media docena de monitores que yá desendolquen xeres divulgatives nos patios de los colexos.
Sicasí, l’actividá decana d’El Garrapiellu ye’l Concursu de Cuentos Curtios n’Asturianu, convocáu tolos años dende 1991 y que da cuerpu, cada quinqueniu, a un llibru coles obres premiaes nesi periodu.

La ruta Xixón-Cuadonga
El coleutivu tamién trabaya la cantera lliteraria en llingua asturiana y, dende 1992, saca alantre’l Concursu de Redaición pa Escolinos, «qu’esti añu tuvimos que suspender, provisionalmente, pol escasu apoyu del Principáu».
Onde sí se moyó l’Alministración autonómica foi na siñalización de la Ruta Xixón-Cuadonga, una vieya senda de pelegrinación que recuperaron los garrapiellos. El Principáu destinó en 1998 cuasi 12.000 euros pa potenciar una vía que recuerren cada añu alrodiu de 15.000 senderistes.

Les socies y socios caleyeros d’El Garrapiellu siñalizaron, asinamesmo, la Ruta del Románicu de Xixón, que visita once parroquies d’esti conceyu.