OPINIONES 3 de abril de 2007

LLUZ NEL AGUA
Cantares

Vanessa Gutiérrez

Ayeri celebrábase'l tercer aniversariu de la inauguración del Muséu del Xurásicu d'Asturies; efeméride que me fixo recordar les palabres d'un amigu recién llegáu de Valencia, que me desplicó la reminiscencia del arte efímeru nes falles. «Ye dalgo que se constrúi, artificial polo tanto, y dafechu temporal», comentaba refiriéndose a les característiques del arte qu'inspira les escultures de cartón piedra, modelaes y pintaes cola finalidá de ser condenaes a la quema. «Esti añu, nun arrebatu de pretenciosidá, llantáronse más de cuatrocientes pela ciudá y habíales que llegaben a trenta metros d'altura. Más de trescientos millones cuntaben que valíen dalgunes», remataba escandalizáu. Pero na so mirada aínda espalmaba la fascinación, efímera como l'arte, del espectáculu de fueu y cenices nel que se resume, a la fin, la principal fiesta valenciana.

Anguaño, tarreciendo la carrera preelectoral na que nos van metiendo con forceps, y siguiendo'l sinfin d'inauguraciones de porexpán, yo tamién m'empiezo a sentir como un monigote descolocáu en mitá d'un decoráu artificial vestíu de desmemoria. La imaxe d'Asturies que proyectamos al mundu ta engalanada con animales de plásticu extinguíos, murales pintaos a imitación del paisaxe que tenemos desprotexíu, musicada por vanguardies que se pretenden ayenamente modernistes y carente dafechu de la vitalidá que se-y supón a una población que mira'l futuru.

Con too y con ello, el pasáu fin de selmana tuvi la oportunidá de reconciliame cola imaxe de país que vamos encontando cuando, al prender la televisión autonómica, vi la primer emisión d'un programa que lleva por títulu 'Camín de cantares'.

Colos sones d'una tierra antigua, con pasáu y pisando caleya, l'etnógrafu Xosé 'Ambás', baxo la dirección de Ramón Lluís Bande, foi recorriendo nesi primer episodiu les pisaes d'un pueblu y les canciones qu'un día-y punxeron memoria. Per primer vez vi una Asturies retratada na so esencia, cola identidá que-y da'l salise del cartón piedra na busca del paisaxe y paisanaxe propiu.

Per un momentu pudi olvidame de que nós, como los valencianos, nos tamos volviendo efímeres construcciones de cartón piedra ensin más destín que consuminos na almiración del visitante que nunca queda. Per un segundu escaecí esti destín de ser sólo pólvora nun espectáculu de fuegos artificiales. Per un instante como ave fénix, vi un país llevantáse de les futures cenices.

Enlaces Patrocinados