La música tradicional viaxa al futuru
El grupu de folk electrónico Xera presenta la so revolucionaria propuesta nel discu ‘Lliendes’, con diez temes que puen ser descargaos de baldre n’Internet

Francisco Álvarez

La gaita tradicional y la bandurria asturiana conviven colos teclaos, y los escenarios más o menos espaciosos de les actuaciones en directu cohabiten cola escena universal que-yos concede Internet. El grupu d’electro-folk Xera abre nueves rutes pa la música n’asturianu col so primer trabayu discográficu, ‘Lliendes’, nel qu’esta banda nacida nel Valle del Trubia aplica la so filosofía d’autoxestión y independencia qu’esclui a «los xestores y mediadores que quieren vivir del nuesu trabayu». Los diez temes del discu, autoeditáu por Xera, puen ser descargaos de baldre na páxina web del grupu, que ve l’accesu a la música como «un derechu de les persones y de los pueblos».

Vérval, cantante y instrumentista de la banda, xustifica la distribución gratuita de la so música a traviés de la rede nel «respetu que nos merez la música y cuanto más lloñe llegue, meyor. Nun queremos vivir de les rentes y nun nos paez congruente poner torgues a la difusión musical. El accesu a la cultura ye un derechu reconocíu na Constitución».

Xera dispón d’una llicencia Creative Commons qu’autoriza a los internautes, de forma espresa, a copiar y esparder la so música ensin fines comerciales y dexando constancia de l’autoría de la mesma como únicos requisitos.
Sicasí, el grupu nun renuncia a la venta del discu en formatu compactu. Tienlu distribuíu en dellos establecimientos al módicu preciu d’ocho euros (seis euros pa quien lu compre directamente a la banda).

De Salamanca a Bélxica
Xera entonó en 2004 los primeros cantares. La uvieína Flavia y el piloñés Vérval, vinculáu por mor del trabayu a San Andrés de Trubia, echaron alantre’l proyectu musical, al que s’incorporaron darréu Iván –el primer gaiteru– y Isaac. Al marxe de los sos conciertos n’Asturies, tien actuao nos festivales Etnohelmántica de Salamanca y Folk Segovia.

Amás, va un mes el grupu llevó a cau una minixira per Alemania y Bélxica. «Gracies a la música tamos conociendo muncha xente y otros llugares», siñala Vérval, que dexa claro’l calter multicultural de la propuesta musical de Xera. «La diversidá ye ún de los nuesos principios básicos. Lo mesmo la música asturiana que les dances tailandeses son cachinos de la Humanidá y muestres de la so diversidá», diz.

El soníu de Xera naz, sigún los miembros del grupu, «del sentir del pueblu y la so tierra, emplegando como base la esperiencia asturiana pa facer estensivu’l mensaxe d’universalidá que quier a tolos pueblos, animándolos a que protexan una tierra y una hestoria necesaries pal mundu».