Siempres tentó l’usu de la fala vernácula inclusu a los que nun teníen el vezu de char mano d’ella: ehí tán, ente munchos más, los casos del dramaturgu Atanasio Palacio Valdés, del prehestoriador José Manuel González, del xurista, académicu y caderalgu Félix de Aramburu o de l’eminente folclorista y diputáu Juan Menéndez Pidal, que foron esporádicos poetes bables. A tan illustre nómina axúntase agora’l modestu vate xixonés Antonio Hevia Torres, que roblaba les sos abondoses collaboraciones en prensa col galdosianu alcuñu d’El Amigo Manso, y que dexó espublizaos tres cartafueyos en castellán (‘Violetas’, ‘Fontana de aldea’ y ‘Palomas blancas’).

Embaxu l’epígrafe ‘Decir asturiano’
apurre una tienra composición
de cellebración pol ñacimientu
d’una neña, entitulada
‘Floriquines’ (LA VOZ DE AVILÉS,
14-VIII-1932) y qu’unvía na
dedicatoria «pa la fía de B. I. F.»,
que nun ye otru que l’escritor avilesín
Indalecio Fernández Balsera,
collaborador de prensa y conceyal
melquiadista.
Floriquines guapes
pa la pequeñina,
que ella ye otro brote
de la so familia.
¡Mira cómo ríe
y cómo se enrita,
los güeyos azules,
toda una delicia;
con aquella cara
tan guapa y gordina,
y con les rareces
que tien... como Inda!...
¡Con los dedos suaves
que son ñácar viva!...
Que de los que sufren
sea siempre amiga;
que adeprienda bien
lo de so familia,
¡tan buena pa todos,
pa todos sencilla!
Guapes floriquines
corté en la mio quinta,
y quiero mandales
a esa pequeñina
con un beso adientro...
¡que ye l’alma mía!