9 de xineru de 2016

R E P O R T A X E


La casona'l Conde

PABLO ANTÓN MARÍN ESTRADA

Desque llegara a l’aldea pasaben los díes como camperines sueltes pel prau de l’allegre rutina. Al Conde prestába-y esa imaxe alcordada de la remota infancia, alló nos pastiales de branu del so país, de la que los aldeanos enveredaben el ganao monte arriba hasta les mesmes llendes del Castiellu.
Nun yera la primer ocasión que-y tocaba prebar el tastu agrín del exiliu y de la derrota. De toles batalles perdíes saliera un daqué más cansu, feríu y resabiáu. Venciera a les derrotes. Los turcos nun pudieron acabar con él, tampoco aquellos fatos súbditos del Imperiu Británicu colos que acabare por compartir tierra nuna de les sos últimes odisees nin aquellos, más babayos ya ignorantes, los emisarios que-y unviara’l Conducator Ceaucescu a espropia-y la casa de los de só. Fuera, paradóxicamente, el periodu postcomunista y después la entrada del país na Unión Europea, les razones más poderoses pa sacalu del castiellu familiar y emburrialu a un inciertu destín lloñe de la so tierra, como a milenta compatriotes suyos.
Fueran una vez más los sos antiguos siervos, convertíos nos sos cómplices y amigos, los xitanos kalderash los que-y echaron un gabitu pa dexar el llugar natal ensin que les autoridaes interiores y fronterices se decataran. De Transilvania a Bucarest viaxó nuna funeraria robada y de Bucarest hasta aquella apartada aldea del occidente d’Asturies na baca d’un esgonciáu autocar, afartáu de romas llocos por atopar nel últimu cabu d’Europa, nes Españes la so verdadera tierra de promisión. Dellos d’esos viaxeros diben más contentos que’l restu colos doblones d’oro de llei na fardela que’l Conde-yos ufiertara por aidalu. Otro tanto de compensa esperábalos en llegando al destín, una casona d’indianos nel conceyu de Tapia que’l propiu Conde axenciara pa arriendar per internet. Toos ellos diben corriendo kilómetros pel continente vieyu mientres soñaben mudar aquellos doblones en dendatures enteres, collares, pulseres, aniellos, pendientes, cadenes, relós, colgadielles cola mesma ilusión d’un raperu inda anónimu del Bronx.

 

21 de payares de 2015

E N T R E V I S T A


Esther Prieto
Escritora. La cabraliega espubliza ‘Chicolate espeso’, un recopilatoriu d’escritos suyos apaecíos en ‘Les Noticies’


«Contra menos falantes, más simpatía cola llingua»

ENRIQUE CARBALLEIRA

Los escritos que formen ‘Chicolate espeso’ espublizáronse en ‘Les Noticies’, selmanariu n’asturianu yá desapaecíu hai un tiempu. Nun tán recoyíes toles que fueron apaeciendo a lo llargo de dellos años en dos etapes distintes: la primera entamó a finales del sieglu XX y la última acabó col pieslle’l selmanariu, nel 2012. Les qu’apaecen equí tán dataes ente los años 2000-2002 y 2010-2012. Al pesar del tiempu pasáu, nun perdieron gota d’actualidá. Esther Prieto (Arenas de Cabrales, 1960) diose a conocer como poeta nel 1992 con ‘Edá de la memoria’ y nel 1998 ganó’l Premiu Teodoro Cuesta de Poesía con ‘La Mala suerte’ (2000). Con ‘Güelu Ismail’ algamó’l Premiu Xosefa Xovellanos de Novela 2001 y unos años más tarde (2005) publicó ‘Gramática d’asturianu. Guía de consulta rápida’, resultáu del so llabor profesional de correctora editorial.

 





A S T U R I E S C U L T U R A L
O P I N I O N E S

OTRA HABITACIÓN
Cadena de frío
Fran Gayo regalónos nos últimos compases del añu que morría pa renacer n’otru meyor, un llibru imprescindible. Apunten el títulu: ‘Cadena de frío’. ‘Cadena de frío’ ye una bitácora de la extrañeza como base del sentimientu d’identidá que se va traduciendo, poema a poema, na non-pertenencia o na imposibilidá (dolorosa) de pertenecer...[...]
O P I N I O N E S

LLUZ NEL AGUA
Smith
Garró una cámara de fotos como cualquiera s’avera al arte: por pura imitación. Nel so casu, por reproducir una costume de so madre, pero que, gracies al so talentu, acabó por consagralu como ún de los principales fotógrafos del sieglu XX. Cómo non, naciendo en 1918, la II Guerra Mundial fue ún de los sos grandes temes. Pero pronto cambiaría la mirada. De los soldaos al sufrimientu de los civiles; de la primer llinia de lo belicoso al últimu escalafón de les víctimes:
[...]
O P I N I O N E S

OTRA HABITACIÓN
Memoria hestórica
Sevilla, 10 de payares. 11 hores. Cuartu del hotel. Tengo que preparar la presentación de la película nueva pa la estrena d’esta nueche. Escribo: « Nun me presta nada la construcción oficial, institucional, del conceptu ‘memoria hestórica’». Siempre s’utiliza p’aisllar un momentu de la hestoria (xeneralmente traumáticu) y, una vez aislláu, esterelizalu pa que nun tenga nenguna capacidá d’influencia nel nuestru presente políticu. «[...]

V I D E O C H A T
Charla con Dixebra

E N L L A C E S

Tolos centros asturianos
XVI Premiu a la meyor páxina web asturiana