MARRÓN

Ramón Lluis Bande




28-setiembre-2019

En 1976, la televisión sueca estrenaba la película documental ‘Kvinnor i Kamp’ (’Muyeres en llucha’), protagonizada por un grupu de muyeres antifranquistes que cuenten les sos esperiencies na llucha contra la dictadura. Dos de les protagonistes son Carmen Marrón Llaneza y Anita Sirgo. Esta película que, con quince minutos brillantes rodaos na cuenca minera asturiana, tendría de pertenecer al nuestru patrimoniu cinematográficu, a la nuestra memoria colectiva como parte del relatu que nos esplica, nunca s’estrenó n’Asturies.

Nella, Carmen Marrón cuenta l’asesinatu del padre, fugáu en monte. El cineasta, que tuvo accesu a eses imaxes gracies a un grupu de persones que trabayen nuna película nueva que dialoga con aquella, trescribe, conmocionáu, fragmentos del testimoniu nel cuadernu de trabayu: «Nosotros somos unes persones trabayadores, honraes, y tuvimos que ser hasta lladrones. Porque tuvimos qu’hasta robar pa poder mantenenos, ensin ser lladrones, que yera lo que más sentíemos. Yá nun teníemos que lleva-yos. Nun-y podíemos pidir a naide, porque si pidíemos teníemos mieu que los denunciaren y los garraren. Entós, yo taba en casa d’una tía y pensé roba-y una pita, y robé-yla pa llevá-yosla. Y llevé-yosla y ellos cociéronla y nesto descubriéronlos». «Mio padre nel momentu fizo fueu, colo que pudo, y cuando vio... él quería que’l mio hermanu lu matare a él y él al mio hermanu, porque sabíen lo que diben facer con ellos... Nun tuvieron valor pa con aquel tiru que-yos quedaba matase l’unu al otru y garráronlos». «Nun queríemos salir d’aquel cuartel porque sabíemos que los diben a matar. Y ellos [los militares] engañáronnos, dixéronnos que marcháremos y que-yos lleváremos l’almuerzu al otru día. Y cuando a les seis de la mañana yá llegamos col almuerzu, entrégennos una carta qu’ellos [el padre y l’hermanu] escribieren dende’l cementeriu... yá muertos... enterraos yá... Nun pudimos metelos en caxa nin nada, enterráronlos ensin caxa. Mio padre, naquelles últimes lletres, dicíanos que fuéremos llaboriosos y honraos».

Al llau d’esti testimoniu brutal, el cineasta apunta tamién una reflexón qu’alcuentra de casualidá nel llibru que ta lleendo: «Pa les clases dominantes, la política ye les más de les veces una cuestión estética: una manera de ver el mundu, de construyise como individuos. Pa nosotros, yera vivir o morrer» (Édouard Louis).