OFELIA EN RIOTORTO

Pablo Antón Marín Estrada




5-ochobre-2019

Qué sería d’Ofelia?. L’amigu que pasara primero per Riotorto, l’aldea natal de la madre d’Álvaro Cunqueiro a la busca de dalguna buelga del escritor, arremellaba los güeyos cuando-y cunté que la única vecina del llugar a la que-y sonsacara dalgo del magu mindoniense llamábase Ofelia. Topárala como’l que diz de casual de la que taba ya pa marchar del pueblu, decepcionáu de que nadie ellí me fuere dar seña siquier de ú taba la Casa Moirón, onde naciera so má Xosefa. Vi una tiendina de pueblu pesllada, polo que s’acolumbraba, de cuantayá; sicasí dalguna mano recién tenía encuriosao l’escaparate con xuguetinos vieyos y dos xarrones con orquidies. Pel escaparate adicábase un mostrador con dos cartelos grandísimos enriba de Pasionaria y Fidel Castro. Embaxo d’ellos, nuna repisa había fotos de la comunión d’una neña y una foto de Cunqueiro. Nel interior del antigu comerciu tamién adiqué una sombra que remanecía del fondo tirando pa la puerta.

Aquella muyerina mirábame con rocea y un rellumu trémole, como d’arrepentimientu por abrime. Cambió-y la cara nel momentu que pronuncié el nome de don Álvaro. Invitóme a pasar y señaló pa la estantería qu’había embaxo la foto del escritor. Ellí taben tolos sos llibros, les primeres ediciones de Galaxia y les de les noveles en castellano que publicara en Destino, rediciones actuales; tamién una traducción al rusu de ‘Merlin y familia’ –según me dixo– editada en Cuba. Llamábase Ofelia y naciera en La Habana. So padre emigrara a la isla de Riotorto y fuera ún de los fundadores del Partíu Comunista Cubanu. Ella viniera nel añu cuarenta y nueve con una hermana más grande y abrieran la tienda.

Cunqueiro pasaba entós temporaes llargues en Riotorto. Volviera escapáu de Madrid d’aquel asuntu pol que-y quitaran el carné de periodista y yera, cuntábame Ofelia, un home gachu, avieyáu enantes de tiempu, miedosu de falar una palabra más alta qu’otra. Alcuando entraba na tienda a comprar rosquilles d’anís. Siguió faciéndolo tola vida y la última vez que fuera per ellí, asomárase pa saludala y naguando poles llambionaes que-y prohibieran los médicos bisbisára-y con un filín de voz: «Ofeliña, nada doce é ser vello». Lo mesmo que diz el so Don Hamlet enantes d’aforcase, precisa ella.