EN XIXÓN

Ismael González Arias




18-abril-2020

En Xixón ella siguió rompiendo ordenadamente cartes, documentos, fotos, fuina con un pasáu del qu’aborrecía sentir les sos garres. Too nella yera deconstrucción. D’ehí qu’abrazara’l cerru, símbolu de la ciudá y tamién llinia del horizonte. D’oleu verde, madera, bronce o acebache, el cerru, mudu pero presente, pasó a formar parte de la so iconografía personal. Pesie a la so férrea educación católica, fascinába-y l’oriente, l’hinduismu, creyía na progresión de la persona nos niveles d’iniciación y, al igual que la lluna, tenía fases secretes. Buscó nos llibros les claves del misteriu. Afirmó en bien d’ocasiones que, de tener una fía, y aprendería la vida al traviés de les puestes de sol tres del cerru. Porque yera una fabuladora nata.
L’alcordanza del so orixen humilde, la dolorosa memoria d’una infancia desgraciada, sórdida, atormentóla durante tola so vida. Y decidió reescribir la hestoria, la so hestoria, pa lo que la lliteratura y la imaxen recortada del cerru brindaba-y la meyor de les coartaes. Lleía n’inglés ‘La Regenta’, pa nun cometer la vulgaridá de facelo en castellanu, y les sos ringleres uniformes marcáron-y un puntu de partida a lo vedao, lo deseao y lo temío, conxuraos en xunto pol viaxe al interior d’ella, qu’acabó por descubrir. Nesi momentu la conocimos, cuando yera un refuxu, y pa nosotros una afición. La so más grande victoria.
La pintura permanente, la lluz filtrada de la playa, la ñublina de sol pálidu, la muria cansada del balneariu romanu, obra maestra d’un tiempu en forma de retablu d’una vida pasada. Les teles riques, el negru y el doráu, el barrocu, un torsu d’Augusto, una virxen de Borgoña, un buda milenariu... Hasta que la so vida construyó un espaciu de llibertá p’afrontar les verdaes más graves. Los viaxes más grandes siempre se faen nun diván. Xixón subyugóla, pero non solo eso. Ella conoció’l cerru de Santa Catalina dende la ventana y supo que yá nun necesitaba meyor llugar qu’ésti. Yera Venecia, yera Istambul, yera Catai.