UN TESORU Y UNA TUMBA

Ramón Lluís Bande




26-mayu-2020

Hai una entruga qu’obsesiona al cineasta nos últimos años: ¿Ye’l cine un dispositivu capaz d’abellugar la memoria? ¿Pue una colección d’imaxes, palabres y soníos ordenaos na pantalla xenerar un espaciu de memoria colectiva? L’artista alemán Horst Hoheisel dio rempuesta a esta cuestión: «Tolo que fain los artistes pa recordar los crímenes del pasáu ta mal, incluyía la mio propia obra. Namás podemos facelo más o menos mal. Pero enxamás vamos poder trazar la imaxe verdadera de la historia verdadera». Un pensamientu cargáu de razón, pero que’l cineasta tamién entiende como una invitación –una prevocación– pa siguir intentando proponer dispositivos cinematográficos que cola colaboración activa del espectador seyan quien a construyir sentíu al nuestru presente, apoyándose na disputa polos significaos del pasáu. Dispositivos que tengan la voluntá de xenerar memoria, de recuperar momentos obturaos de la historia, representando lo que nunca enantes foi representao.
Buscar les razones d’esa falta de representación. Romper el silenciu absolutu col que’l presente tapeció dalgunes partes del nuestru pasáu. Trabayar con cenices d’esi pasáu –«nun se pue falar del contactu ente les imaxes y lo real ensin falar d’una especie d’incenciu», diz Didi-Huberman– y, desconfiando de la capacidá del nuestru propiu dispositivu, aceptando que la película nun pue facer memoria pol espectador, que valga polo menos pa devolve-y esa responsabilidá. El cineasta fai un trabayu paciente coles imaxes y les palabres del pasáu, consciente de que la película que propón pue ser, al tiempu, un tesoru y una tumba de la memoria: «Yá seya esi tesoru un simple falopu o esa memoria tea trazada nel sable enantes de qu’una fola la disuelva» (Didi-Huberman).