MAL D'ARCHIVU

Ramón Lluis Bande




07-xunetu-2020

El cineasta sigue cavilando sobre la capacidá del archivu pa xenerar memoria. Sigue construyendo’l diálogu d’una colección de fotografíes con una serie de testimonios escritos de la mesma época esperando que pase dalgo. Con una idea cuasi mística: quier superar los significaos independiente de les imáxenes y les palabres pa que xuntes, en contactu, xeneren un incendiu. Y el fueu ye una realidá viva. Quier que’l so trabayu –la distancia estética que xenera’l tratamientu creativu de los materiales preesistentes– consiga superar les llendes simbóliques del monumentu, como espaciu estáticu d’homenaxe y recuerdu, pa convertise nuna invitación a la reflexón crítica, al apredizaxe y la comprensión d’esi pasáu al que s’avera la película: la resistencia organizada de la clas obrera asturiana contra l’agresión del facismu español (y européu) en 1937.
El cineasta alcontró qu’un trabayu imprescindible yá taba fechu, polo menos en parte: les evidencies fotográfiques taben archivaes, garantizando d’esta manera la so supervivencia como parte de la nuestra memoria colectiva, porque como asegura Susana de Sousa Dias: «Un archivu constitúi ún de los accesos privilexaos al pasáu, yá que ye ún de los recursos al traviés de los que s’intenta dar rempuesta a les paradoxes del tiempu y de la memoria».
Sicasí, l’archivu nun se pue confundir cola memoria que quier abellugar. L’archivu solu nun ye quien a xenerar esa memoria. Ye’l trabayu cinematográficu con esi archivu –simiente del escaezu tamién– el que pue xenerar una forma que consiga que la memoria entame a trabayar. Y cuando la memoria trabaya empieza’l cuestionamientu del poder, porque como escribió Derrida: «Nun hai poder políticu ensin poder sobre la memoria».