MIRANDO UNA NUBE

Ramón Lluís Bande




1-setiembre-2020

El 30 de xunetu de 2014, James Benning mentanto conducía pela carretera que lu llevaba dende la universidá onde ponía clas hasta casa, en Val Verde, afitó l’atención nuna nube descomanda nel cielu. La nube acompañaba’l so viaxe y él pensó que si la filmaba podría tener un regalu prestosu pal so amigu Harun Farocki. Naquel tiempu Benning taba faciendo una colección de películes-regalu pa un grupu d’amigos. Namás llegar a casa garró l’equipu de filmación y rexistró la nube. Encuadró y dexó de mirar pel visor, apartóse de la cámara y dexó que los aparatos de rexistru d’imaxe y soníu ficieren el so trabayu cola frialdá y la precisión de les máquines.
Rodar esa nube –la necesidá de facelo– cumplía’l programa que Benning venía desendolcando dende facía años: mirar coses que tuvieren esperando ser vistes. Unes hores depués de rexistrar aquella nube mientres más d’una hora, y pue incluso qu’enantes de visionar lo rexistrao, llegó-y un mensaxe al traviés del facebook. El mensaxe yera curtiu y tremendu: «Morrió’l cineasta Harun Farocki». Poco tiempu depués, na presentación pública de la película –‘Farcoki’, 77 minutos, una película que nun taba pensada pa la exhibición en público–, Benning dixo: «Farocki ye esa nube. Asele en paz». Depués mandó-y la película a Anna, la fía de Farocki, acompañada d’una carta sentida: «Harun Farocki yera un home reflexivu. Pa min tenía sentíu de les coses. Miró nos sitios correctos. Yera analíticu y poéticu, sutil y audaz. Y conocía’l poder de la redundancia y la forma. Pero lo que más me prestó foi la so risa. Venía de lo más fondo del so corazón».