10 payares 2020
Un llibru de Mao da vueltes nel aire delantre la cámara… En 1967, Harun Farcoki rueda una de les sos primeres películes curties: ‘Die worte des Vorsitzenden’ (‘Les palabres del presidente’), una obra maestra de l’axitación política que, en descripción del propiu Farocki «tien la estructura d’un anunciu, y pon n’escena una metáfora: les palabres puen convertise n’armes». L’acción que propón ye cenciella: una persona que llee’l llibru de Mao que vimos xirar arrinca unes páxines, fai con elles un avión de papel y llánzalu contra’l Sha d’Irán, Mohammad Reza Pahlaví, y la so muyer, Farah Diba, que tapen la cabeza con bolses de papel como les que llevaben los estudiantes iranís nes manifestaciones pa que nun los identificaren. La intención detrás d’estes imáxenes ye tresparente: una invitación a pasar a l’acción, a convertir la teoría revolucionaria n’acción.
Como escribió Hito Steyerl, «Al traviés de la obra de Farocki, el conflictu continúa manifestándose en situaciones y oxetos mundanos. Nesti casu, nuna fueya de papel. El conflictu nun ye namás parte del conteníu, sinón tamién del decoráu». Nesta película, amás, el conflictu continúa –faise fueu, en cierta manera– na pantalla de créitos final. Xunto a Farocki apaecen tamién Otto Schily (actor) y Holger Meins (director de fotografía).
Años más tarde, en 1998, Schily llegaría a ser ministru d’Interior d’Alemaña col SPD, mentanto que Meins, militante de la Rote Armee Fraktion (RAF), morriere na cárcel –nuna fuelga de fame– el 9 de payares de 1974. Esto ye, volviendo a Steyerl: «Ún d’ellos convirtióse nel rostru del Estáu, mentanto que l’otru morrió siendo’l so enemigu. La producción contién un conflictu. Ye la so forma más básica».