LOS CUADERNOS

Ramón Lluis Bande




22 avientu 2020

Cuenta’l filósofu Giorgo Agamben en ‘Autorretrato en el estudio’ que’l so verdaderu llaboratoriu de trabayu son los cuadernos nos que día tres día va anotando la vida: pensamientos, observaciones, notes de llectura, cites... D’esos apuntes inconexos, que munches veces relaciónense unos con otros de manera precaria, inverosímil –como la vida–, naz el xerme de los llibros del futuru. Agamben, que guarda tolos cuadernos –dende 1979– nuna estantería del so estudiu, reconoz que nun sabe cómo enfrentase a ellos, que nun ye quien definir con esactitú qué son: «A veces paécenme la parte más viva y preciosa de la mio vida, y otres, la so puxarra inerte». Pero lo que sí sabe ye que prefier el conteníu d’esos cuadernos a los llibros publicaos, «porque cola so caligrafía azotada y quebrada, son la imaxe más fiel de la potencia, que guarda intacta la posibilidá de ser y de nun ser, o de ser otra cosa».
El cineasta, que repasa los cuadernos propios del añu de la peste pa facer balance, inaugura unu nuevu –enantes de fecha según la superstición propia– trescribiendo una idea que’l periodista Ovidio Gondi escribiere poco depués de la cayída d’Asturies n’ochobre de 1937: «Somos una tierra ensin bandera, ensin idioma, ensin fronteres de rencor pa con naide. Pero queremos la nuestra tierra como cualquiera pue querer la d’él, porque’l nuestru amor naz de la sangre qu’empapa los sos montes, los sos valles endulzaos de nublina y sol». Nel momentu mesmu que llevanta’l bolígrafu del papel siente’l temblor emocionáu que da anuncia de que con esi actu d’escritura cotidiana y intrascendente arranca un vértigu nuevu cargáu de la potencia de la posibilidá.