V. SIEGLU XX (I) L’ESPORPOLLE REXONALISTA

Pablo Antón Marín Estrada




El sieglu XX escomienza pa la lliteratura en llingua asturiana ente los ecos inda presentes de los autores más difundíos nes últimes décades de la centuria pasada y el llabor asturianista del llamáu Grupu La Quintana, con nomes como los de Julio Somoza, Benito Canella, Felix Aramburu o Braulio Vigón

Estos intelectuales y los sos trabayos alrodiu la cultura asturiana van ser una especie de ponte ente los llogros del XIX y la xeneración d’autores que se dan a conocer dende los entamos del nuevu sieglu hasta un periodu, que cásique tolos estudiosos actuales, coinciden n’acutar cola guerra civil española. Les figures cimeres d’esta promoción lliteraria son les de Xosé García Peláez ‘Pepín de Pría’ (1864-1928), Constantino Cabal (1877-1967), Emilio Robles Muñiz ‘Pachín de Melás’ (1877-1938), el Padre Galo Fernández ‘Fernán Coronas’ (1884-1939) y Enrique García Rendueles (1880-1955). Alrodiu d’ellos escriben na nuestra llingua una curiosa nómina d’autores como Marcos del Torniello, Daniel Albuerne, Pachu’l Péritu o Antón el Chiova ente otros.

Antón García, el primer críticu contemporáneu n’aplicar el métodu xeneracional al estudiu de les nuestres lletres llamó con bien d’aciertu a esti grupu d’escritores la Xeneración del Rexonalismu. L’aparición de les sos obres abulta inseparable del ambiente favoratible al amor pola tierra y la so identidá que marquen no político la publicación de la ‘Doctrina Asturianista’, promovida en 1918 pola Junta Regionalista del Principado y nel mesmu añu del folletu ‘Verdadero regionalismo asturiano’ de Nicanor de las Alas Pumariño. Nel ámbito de la creación cultural surden pintores como Nicanor Piñole, Juan Menéndez Pidal o Sebastián Miranda o músicos como Eduardo Martínez Torner y Baldomero Fernández, ente otros. La relación de cásique tolos mencionaos lliteratos col movimiento rexonalista foi bultable y mesmo apaez documentada nes dedicatories de les sos propies obres.

Ún de los primeros autores en publicar ye Pepín de Pría y failo con una pieza teatral costumista: ‘¡A L’Habana!’ (1895), un xéneru que diba siguir cultivando más alantre, inda’l que lu fai resaltar y onde apuslló con más enfotu lliterariu ye’l de la poesía con títulos como ‘Nel y Flor’ (1924) o ‘La fonte del cai’ (publicada póstumamente en 1958 pol IDEA). Los sos versos, inda beben nes fontes de la tradición asturiana afáyense enxugaos poles formes del modernismu. Un exemplu úfrenlu estes llinies del so poema ‘La nuiche’:

¡ Qué dolces tan los cielos
Al fenecer la tarde,
Cuando non hay un ñublu...
Cuando non xibla un aire...
Cuando llume sereña
Selino caye... caye...
Y esnidia... y alonxana...
Y esvanécese... y vase... !
¡ Qué guapa ye la nuiche
Cuando' l tesoru esparde
De sos arrellucientes
Fermoses lluminaries !

Buelgues modernistes, pero peñeraes de romanticismu serondu y un ciertu neopopularismu vamos alcontrales tamién na obra del que ye, ensin dubia, el poeta mayor d’esta xeneración: Fernán-Coronas. Consideráu por críticos y escritores de los nuestros díes, el primer autor modernu n’asturiano, la calidá de les sos composiciones poétiques nun tien parangón cola de nengún otru autor anterior o del so tiempu. Ye al empar, de toos ellos, la personalidá más culta y l’únicu que manifiesta d’una manera dafechu consciente la so intención d’arriquecer el cultivu lliterariu de la llingua asturiana con vocación normalizadora y entendiendo’l mesmu idioma como verdaderu llume d’un deseáu resurdimientu del antigu Reinu d’Asturies. Con amplios conocimientos de les lliteratures notres llingües enfotóse como Acebal en treslladar testos cultos al asturiano, traduciendo ente otros a Goethe, Heine, Novalis o haikus xaponeses. Como amuesa del so dicir poéticu fondu y eleváu valga ún de los sos testos más remembraos:

LA INCLA INTERIOR

Escurézseme outra tarde
Desta mi vidina breve:
Tou solín na mi solana
Cula lluz del sol que muere,
Ascuitandu que aquí en dientru,
Nu mieu peitu, sonan guelpes:
Diz que son las martelladas
D’un martiellu persistente
Que martiella ya esmartiella,
Ya de día, ya de nueite.
Sin parar ta clabuñandu
La gadaña de la muerte.

La impronta de la estética modernista vamos alcontrala igualmente na poesía d’otru de los autores del rexonalismu qu’algama otru sitiu destacáu en cuantes a la calidá de les sos composiciones: Constantino Cabal. Ye nesos parámetros onde s’inxerta el so llibru ‘L’alborá de los malvises’, asoleyáu en 1944 (una fecha qu’escapa inda non mui llonxe de la llende acutada cola guerra civil) y sotituláu explícitamente “Los madrigales del bable”. En comparanza colos sos contemporáneos, el so autor ye tardiegu en publicar los sos poemes y hasta esi momentu, tola so obra ye de divulgación de la cultura tradicional asturiana. La so mesma lonxevidá vital y la bayura de títulos de toa mena firmaos pola so plumba valiéran-y nos sos años postreros el títulu oficiosu de ‘Patriarca de les lletres asturianes’. Los versos conteníos en ‘L’Alborá’, inda se lleen con gustu güei inda alcuando amarguxen el bon tastu con cierta ranciura d’otru tiempu:

ENA LLUZ MELANCONIOSA

Ena lluz melanconiosa
de les hores d’acordances,
cuando surde la borrina dende todes les fondures
y non gotien esperances
per deyures,
la visión de la tierrina
que s’enrieda nel espaciu
aseméyame enconxuru de prefume falageru,
qu’enguedeya na borrina llumarales de topaciu
y fogueres de lluceru...

Otra figura resaltable de la xeneración rexonalista constitúila la de Pachín de Melás. Cultivó la poesía, el teatro costumista y la narración de la mesma temática, ya anque nun algamó los altores calidables de otros contemporáneos la so principal contribución al espoxigue de les nuestres lletres foi la d’infrayable entamador d’iniciatives con esi propósitu. Emilio Robles foi el propagandista más activu de la cultura na nuestra llingua, un llabor que desenvolvió dende les páxines de prácticamente toles publicaciones periódiques de la so dómina como puxador de toa triba de proyectos: dende recitales públicos o conferencies hasta la puesta a andar de colleciones editoriales dedicaes a ufrir pieces teatrales o narratives como la de ‘La Novela Asturiana’.

Divulgador asinamesmo arriendes d’escritor foi el más mozu –xunta Fernán Coronas- d’estos autores, el sacerdote Enrique García Rendueles. La publicación en 1925 de l’antoloxía ‘Los nuevos bablistas’ retomaba l’enfotu de Caveda y de Canella, pa recuperar testos ya clásicos, como los del propiu Xosé Caveda y Nava, Acebal o Cuesta y amesta-yos otros poetes del so tiempu. Carlista y amigu de los clásicos como’l autor de ‘Cantar y más cantar’, foi un versificador delicáu y de fortuna irregular nos sos llogros. ‘A la lluna (Himnu homéricu)’ ye un de los sos poemes más curiosos:

Los que tenéis la fala melguerina,
Y sabéis dar el son col caramiellu,
Enfilái duces cantos á la Lluna
Qu' esnala seliquino per el cielu,
Arrodiando la tierra nos rellumos
Que ñidios manen de sos claros güeyos;
Pos esplandien les ñubes com' el oro
Si, depués d' esfrecése nel Océanu,
Encapiella los mantos y los blincos,
Y asentada nel carru va rixendu
Los fermosos caballos d' abundosu
Pelamen y de altivu y ñoble cuellu.
Con illa, n' utru tiempu, 'l padre Xove
Axuncióse n' amores enel llechu,
Y el frutu de sos goces fo Pandía
Qu' entre los imortales hebo asientu.
¡ Oh reina ! diosa de los blancos brazos,
Devina Lluna d' inguirñau cabellu;
Entamaré por tí les allabancies
De emprunaos varones qu´en punteru
Festexen los poetas, qu´á les Muses
Deben los llabios de cantar melgueru.

La guerra civil va marcar un enantes y un después pa la xeneración rexonalista. Dos de los autores más destacaos: el Padre Galo y Emilio Robles Muñiz muerren en plena contienda, el primeru, enfermu y probe nun asilu de L.luarca y Pachín de Melás, presu na cárcel de El Coto de Xixón poles nueves autoridaes franquistes. Cola dictadura la nuestra lliteratura diba somorguiase nun de los sos periodos más escuros, inda nél había prender el guañu del futuru resurdimientu pa la llingua asturiana.

Hestoria de la Llingua asturiana