L'ASTURIES QU'ESCAEZ

Inaciu Galán




14-setiembre-2019

Esti añu 2019 fixo cien años de la fundación en Xixón de la Real Academia Asturiana de les Artes y les Lletres, que se punxo al llabor de normativizar l’asturianu y da-y difusión de la mano d’autores como Pin de Pría, Fabricio, Calixto Rato o Pachín de Melás. Con unes idees mui clares afirmaben: «El problema lingüístico del bable lo vamos a ventilar nosotros en la Academia Asturiana, fijando sus leyes gramáticales y fonéticas, regularizando sus apóstrofes y afijos, su ortografía y prosodia y señalando su origen etnográfico»

Esti Academia, que Fabricio diba facer por recuperar dempués de la Guerra Civil y que yá nun diba ser posible hasta la fundación de l’Academia de la Llingua Asturiana en 1980, bien merecía cuntar con un reconocimientu de dalgún tipu, asina como cola recuperación de l’alcordanza d’esta inciativa, que xurdiera yá nel sieglu XVIII de les indicaciones de Xovellanos pa crear una institución dedicada al estudiu y el curiáu del asturianu.

Tamién en 2019 ye l’aniversaru, nesti casu’l cincuenta, de la fundación por José León Delestal y Llorienzu Novo Mier de la organización Amigos del bable, una entidá qu’en 1969 va ñacer nun momentu nel que l’asturianu y la cultura asturiana pasaben quiciabes pel so peor momentu hestóricu. Con ánimu, con orixinalidá y con idees que pretendíen dar pasinos alantre na normalización del asturianu, creen la «Discoteca del bable», onde figures reconocíes del momentu, como la llocutora Menchu Álvarez del Valle o l’actor y cantante Antonio Medio, recitaben o cantaben testos n’asturianu.

Cuando en 1970 ta estudiándose nes Cortes la entrada nes escueles de les llingües d’España distintes del castellán, piden que l’asturianu tenga’l so espaciu. Organicen conferencies defendiendo l’asturianu, fiestes alredor del idioma y les sos creaciones culturales, el premiu «Xana del bable», pa reconocer a les persones y entidaes que trabayaben pol idioma, y por supuestu, l’Asamblea Regional del Bable, en 1973. D’ella diba xurdir l’asturianismu modernu que yera yá Conceyu Bable un añu más tarde.

N’otros territorios, estos aniversarios daríen llugar a celebraciones y actos culturales. Como siempres na Asturies qu’escaez, pasarán inadvertíos. O non. Tamos a tiempu de remedialo. Conocer y recordar la hestoria ye clave pa construyir el futuru d’Asturies.