12-ochobre-2019
Nos años 90, el fenómenu de les bandes de gaites biltaba, con gran puxu, na escena musical asturiana. En tolos conceyos nacíen bandes de gaites col oxetivu de da-y salida a los neños y les neñes que deprendíen a tocar la gaita nes asociaciones culturales, escueles de música, etc. Desfacíase una banda y había xente pa facer otra, u otres dos.
Un momentu bien afayadizu nel que la ilusión yera’l motor d’estes agrupaciones y onde la motivación de los sos componentes yera indiscutible. La posibilidá de facer música, viaxar y conocer mundu, y facer coses nueves colos collacios yeren les razones que remanaben los gaiteros y les gaiteres pa explica-yos a los que nun tocaben, por qué taben nuna banda gaites. Un fin de selmana nun alcuentru bandes, un festival en Zamora (por poner un exemplu), una espicha cuando termines de tocar, una nueche folk, entamar un conciertu,… cualesquier sida yera bona pa motivar, atrayer xente y facer país.
Darréu d’unos años nos qu’esti fenómenu estabilizóse (porque yera difícil siguir espoxigando al ritmu que lo taba faciendo), anguaño, alcontrámonos nun momentu nel que tenemos que replanteganos oxetivos nuevos y motivaciones pa enganchar a los neños y les neñes. Vivimos nuna sociedá na que la xente mozo tien bien cenciello l’accesu a too y na que los guah.es tan perviaxaos por ún u otru motivu, amás de que tán estragaos d’actividaes.
Falando con otros maestros y maestres, toos coincidimos na falta de compromisu y constancia de les xeneraciones nueves, lo que ye ún de los principales problemes que s’alcuentren a la hora de trabayar nes sos agrupaciones.
Nun ye cuestión de buscar culpables nin de repartir responsabilidaes; el nuestru retu ye buscar nueves motivaciones qu’atraigan a un públicu mozu y facelos ver, sentir y esfrutar cola importancia de los valores de la cultura de nueso. Nun falamos de que la cantidá tea penriba la calidá, falamos d’otres coses. Esos neños y neñes que nacieron magar l’añu 2000, van ser los que lluchen pol futuru de la cultura, la música y la llingua del país.
Sedría una pena mui fondera que la gaita, el tambor y la música asturiana volvieren a estayes nes que taben averaes a la desapaición.