ORIXINALIDÁ

Ramón Lluís Bande




26-ochobre-2019

En 2004, Jim Jarmush, poco amigu de les normes, publicaba un manifiestu –o anti-manifiestu– nel que compartía les sos cinco regles d’oru pa facer una película. Una colección de regles heterodoxa qu’arrancaba, dende la sabiduría, cola so propia negación: «La regla primera ye que nun hai regles». El cineasta alcuentra por casualidá les recomendaciones del artista norteamericanu mentes salta de les notes pal rodaxe de la película nueva a la preparación de la presentación del so últimu llibru que, como tantes otres veces, naz del mesmu impulsu y el mesmu material narrativu (y emocional) que la so última película. Alcuentra que cuasique tolos conseyos de Jarmush son pertinentes pa les dos xeres qu’ocupen los sos díes, sobre manera la última de les cinco regles, que parte d’una idea-fuercia cargada de potencia y verdá: «Nada ye orixinal». Nesa regla, Jarmush anima a robar de cualaquier sitiu qu’alimente la imaxinación. Aconseya devorar películes –nueves y vieyes–, músiques, llibros, pintures, fotografíes, poemes, suaños, conversaciones, arquitectures, pontes, señales de tráficu, árboles, nubes... toles coses que falen directamente al alma. «Si lo faes, el to trabayu (y robu) va ser auténticu. L’autenticidá nun se pue evaluar; la orixinalidá nun esiste. Y nun t’esmolezas n’esconder el robu, celébralu si quies», escribe. Y pa ser coherente dafechu col conteníu y el sentíu d’esi mandáu, reconoz, al final, qu’esta idea nun ye orixinal, que ta inspirada n’otra espresada por Jean-Luc Godard años enantes: «Nun ye d’ónde garres les coses, ye ónde les lleves».

El cineasta que constrúi la so película nueva con una montonera de materiales ayenos preesistentes, apunta nel cuadernu de trabayu la regla de Jarmush –cola frase de Godard sorrayada–, y piensa, pa terminar de completar el significáu, nel ‘Llibru de los Pasaxes’, de Walter Benjamin, en cómo al traviés d’un trabayu de montaxe de testos –propios y ayenos– fai visible la recolección de fragmentos históricos que «col so contactu formen una constelación d’información, de datos, abiertos a la reconstrucción del so significáu», como señaló la historiadora del arte y artista visual griega Eirini Grigoriadou. Nun se trata de mostrar la realidá tal y como ye –anota’l cineasta– sinón de recomponela dándo-y una forma final qu’abra un trampolín pa la imaxinación.