VIVIR N'ASTURIANU

Iván Llera




2-payares-2019

Iniciativa pol Asturianu cumplió está selmana ocho años d’esistencia. Una efeméride bien importante pa tolos que nesti tiempu formemos y formamos parte d’ella. Soplamos les veles cola satisfacción del trabayu bien fechu, sumando ya integrando a persones de toles sensibilidaes por un bien cultural común como ye l’asturianu.

Parez que fue ayeri, pero munches coses separten l’Asturies d’anguaño de la d’esi 2011 nel qu’Inaciu Galán y Víctor Suárez, xunto con una decena de persones, echaron a andar la nuestra organización.

Nesti tiempu hubo ésitos que toos debemos celebrar. L’avance nel procesu d’oficialización de la toponimia tradicional, la homologación del asturianu y el gallegu-asturianu al restu de les llingües europees y el cambéu de postura de la FSA-PSOE sobre la oficialidá son dalgunos exemplos.

Ensin dulda, pasos alantre que nos acerquen a una defensa efectiva de los derechos llingüísticos de tolos asturianos.

Pero sigue habiendo munchos retos pendientes. Les torgues a Berta Piñán pa espresase na so llingua mientres una comparecencia pa esponer el programa de la Conseyería de Cultura, Política Llingüística y Turismu na Xunta Xeneral o les dificultaes de les families pa matricular a los sos fíos n’asignatura d’Asturianu nel sistema educativu siguen siendo una realidá.

Y son namás dalgunos exemplos de los munchos que carecemos quien queremos vivir n’asturianu.

Como bien recueye’l nuesu documental ‘La vida ensin oficialidá’, estrenáu mientres el primer seminariu ‘Oficialidá, el camín constitucional de futuri pal asturianu’, sigue siendo imposible presentar una tesis en la universidad, rexistrar una empresa y incluso poner una esquela n’asturianu.

Nos caberos ocho años, Iniciativa pol Asturianu fízose un güecu nel movimientu se reivindicación llingüística.

Con munchu trabayu y esfuerciu, la nuestra organización supo ganase’l respetu de la sociedá asturiana.

Y vamos siguir faciéndolo, de la mano de quien nos quiera acompañar nesti camín, calteniendo intactu’l compromisu de xunir voluntaes pa salvar les nuestres llingües.