SIGUIR VIVU Y GOLPEANDO

Diego Solís




16-payares-2019

Entá col tastiu britpop de ‘As you were’, Liam Gallagher asoleya ‘Why me? Why not, too’, una declaración d’intenciones d’una de les últimes estrelles del rock n’activu. Y ye que cuando un ex (del grupu de turnu) se separta de los sos compañeros de viaxe, suelen venir los esperimentos y la tendencia ye a dixebrase por completu de tolo fecho. Nun ye esti’l casu del pequeñu de los Gallagher que, p’aliendu de los fans d’Oasis, sigue faciendo prácticamente lo mesmo.

Al igual que nel anterior discu, les resonancies a The Kinks, The Who o The Beatles (xuntos y por separtao) son constantes y evidentes. Por echar morru nel casu de Liam nun va ser, pero tampoco por vender lo que nun se ye, y el cantante tien claro que nun ye un compositor, sinón un frontman (de los meyores) colos finxos mui nidios… que nun ye poco.

L’entamu del álbum ye atronador, un españíu coreable de la mano de ‘Shockwave’, que dexa con abondes ganes de siguir sintiendo’l discu que ciertamente va desinflándose cola escucha. Continúase con ‘One Of Us’, que sigue al filu de la honestidá de ‘As you were’ con aires más pop. Igual que nel so álbum anterior hai guiños pa los beatlemaniacos (recuérdese l’infravaloráu tema ‘When I’m In Need’) como ye’l cantar ‘Once’, un de los más aclamaos.

Como puntu negativu diría que s’introducen vientos que nun acaben d’encaxar en dalgunos momentos y que, baxo’l mio puntu de vista, nun valen p’ameyorar lo fecho. Asina, nesti discu vuelve a dexase fuera a too aquel que nun seya un siguidor de la banda del ‘(What’s The Story) Morning Glory’, lo que nun sé si ye una amuesa de llealtá o una carencia per parte de Gallagher. A él de xuru que-y da dafechamente lo mesmo…y eso encántanos.

A lo cabero, creo qu’esti álbum merez, como mínimu, una oportunidá, que la voz de Liam sigue sonando tan suburbial y despreocupada como siempre y que, en definitiva, siguimos vivos y golpeando. Como si cada vez que saliéremos a pol mundu sonare’l riff de ‘Fuckin In The Bushes’, como si un cantar fixere que nos entrugáremos «¿Por qué yo?» y una voz interna dixere «Porque sí». Dafechamente Rock, dafechamente Liam.