FILMAR UN CUADRU

Ramón Lluís Bande




23-payares-2019

Racconto da un affresco’ ye’l títulu d’un curtiumetraxe que’l cineasta Luciano Emmer dedicó a «ver con güeyu cinematográficu» los frescos de Giotto na Capiella de la Scrovegni de Padua. El mesmu director esplicaba nun testu’l significáu del apueste: «Ver cinematográficamente, entendío como reconstrucción nel TIEMPU, d’un efectu dramáticu, que d’otra banda desendólcase nel ESPACIU. Poro, non una esplicación y esposición de los cuadros de Giotto, sinón la so espresión activa y autónoma». El tratamientu cinematográficu d’Elmer a los cuadros de Giotto naquella película, foi una de les influyencies mayores d’Alain Resnais cuando decidió pasar del montaxe de películes d’otros, xera a la que nun primer momentu quería dedicase, a la dirección: «Emmer permitióme sorrayar una idea que yá me fascinaba, tratar los cuadros y les pintures non como pintures, sinón como si fueren actores, como si fueren yá cine, una escenografía y un set cinematográficu emplegando les regles del montaxe fílmicu, y nun facer un filme d’arte, onde se fale d’arte con tol énfasis que conlleva».

Nel branu de 1937, el pintor, ilustrador y escultor Goico Aguirre encargó a Nicanor Piñole, por petición del Conseyu Soberanu d’Asturies y Llión, un grabáu que reflexare la situación na que s’atopaba Asturies. Piñole dio rempuesta al mandáu con una xilografía titulada «Vaca mugiendo entre ruinas». Con una intención simbólica clara y un apueste d’una carga identitaria fuerte, Piñole sustitúi al toru –símbolu tradicional del pueblu español na pintura– por una vaca berrando, ente la desesperación, el dolor y la rabia, que representa la resistencia aisllada de l’Asturies que sigue lluchando contra l’ataque del facismu. Lucía Peláez, directora del Muséu dedicáu al pintor, esplica: «La vaca, somorguiada nun paisaxe de ruines malapenes suxeríu, nel que se percibe’l pegollu d’un horru como referencia a la identidá asturiana, simboliza la fuercia, pero tamién la impotencia y soledá d’un pueblu abandonáu a la so suerte».

El cineasta axunta estes idees nel cuadernu. Trabaya nuna película na que quier traducir cinematográficamente’l significáu de la xilografía de Piñole, afondando (y radicalizando) la intuición de Luciano Emmer y Resnais: buscando fuera’l cuadru –en fotos, en testos, en dibuxos, notros cuadros...– los elementos de la realidá de los que naz, el so significáu últimu.