IMAXES-DESTÍN

Ramón Lluis Bande




14-avientu-2019

El 24 d’agostu de 1937, nun discursu radiofónicu, Belarmino Tomás, presidente del recién constituyíu Conseyu Soberanu d’Asturies y Llión, esplicaba les razones polítiques de la importante decisión política qu’acababen de tomar y dicía-y al pueblu asturianu: «La nuestra misión nun ye de muerte heroica, sinón de salvación, de llucha ensin tregua, de victoria. Ye a la victoria onde vamos». El cineasta, que trabaya con esti discursu ente más otros na so película nueva, piensa nes munches derrotes que marquen la historia de la clas obrera asturiana dende entamos del sieglu pasáu. Piensa neses derrotes como la simiente en tierra fértil de la que naz –o tendría de nacer– un identidá colectiva fuerte qu’anguaño nin siquiera ye quien a columbrar. La llucha de contino ye más importante que la victoria. Anque como dicía –y de xuru que creyía nello– Belarmino Tomás –víctima de toles derrotes del mundu, pero protagonista de munches de les lluches importantes a lo llargo de la so vida–, anque ye la victoria l’horizonte al que vamos, ye la llucha la que xenera la nuestra identidá. El realizador francés Jean-Gabriel Péirot diz-yos a los sos alumnos –protagonistes de la so película nueva, ‘Nos défaites’– una fras que tien muncho que ver colo que piensa’l cineasta mentanto pon orde nes palabres y les imaxes de la película: «Nun tamos fechos de les nuestres victories, sinón de les nuestres lluches».

Cola película nueva, el cineasta sigue trabayando por poner el so cine –ensin renunciar a una esixencia artística alta– al serviciu d’eses lluches perdides, que representen lo que somos. Frente al cine como instrumentu d’entretenimientu –y, poro, d’alienación– sigue creyendo que se puede desarrollar un cine como instrumentu de pensamientu colectivu, volviendo a conectar col espíritu del cine revolucionariu soviéticu o, más averada a los nuestros díes, la llectura que dende Francia ficieron d’él Godard y compañía al traviés del Grupu DzigaVertov. Un cine con una conciencia fonda de lo político. Consiguir, como les películes de Vertov, proponer imaxes-destín.

«Fuera del cine soviéticu, hai pocos filmes que tengan una esperiencia de lo político tan fonda. Ye induldable que, polo menos anguaño, namás Rusia considera les imaxes que pasen peles sos pantalles como les imaxes del so destín» (Jean-Luc Godard).