LA LLUCHA COMO IDENTIDÁ

Ramón Lluis Bande




21-avientu-2019

La decisión de morrer, de lluchar hasta l’últimu cartuchu, taba nel ambiente que respiraba la clas obrera asturiana, y la so dirección política y militar, nel branu de 1937, recuerda Santiago Blanco, secretariu del Conseyu d’Asturies y Llión, nel so llibru de memories ‘El inmenso placer de matar a un gendarme’. Y, de secute, matiza: «Taba namás nel ánima y nel coraxe de la mística combatiente. Les noticies de les derrotes constantes y de les retiraes, en desorde blasfemante, filtrábase. El pánicu entamó’l so camín demoledor». La cayída de Santander –depués de la del País Vascu–, paecía marcar tamién el final de la llucha n’Asturies. «Nosotros, nel Gobiernu, sabíemos que nun teníemos salvación. Nel frente, hasta los comandantes creyíen nel milagru de recibir una ayuda afayadiza del Gobiernu de la República». Una ayuda que nunca llegó. Naquella situación llende, d’ánimos crispaos y dignidaes inflamaes, la pior acusación yera la de «derrotista». «Una trampa criminal –según Blanco– de la demagoxa nunos y d’un sentimientu sublimemente suicida n’otros». Nesi ambiente, destacó, ente más otres, l’actitú del periodista Acracio Bartolomé, director del diariu «CNT», «un anarquista d’esa clas maraviyosa de llocos con pureza idealista», que nun aceptaba retirada nenguna nos nuestros frentes. Razón que lu llevó a publicar, a ocho columnes en tolo alto de la primer páxina del periódicu que dirixía, un titular qu’indignó a munchos: «¿Ónde tán los coyones de los asturianos?». Énte les protestes de los compañeros de profesión pol desmadre periodísticu que suponía’l titular, Acracio Bartolomé contraatacaba con argumentos irrevatibles. Defendía que la llucha nun yera una acción que buscare esclusivamente la victoria. Dicía que la llucha yera importante por ella mesma. Lluchar yera natural y ganar yera, namás, una posibilidá. Inda cola derrota asegurada –dicía– la llucha tenía que siguir. Y ponía milenta exemplos históricos colos que se demostraba la so posición –dende la resistencia a los franceses en 1808 hasta la revolución d’ochobre de 1934–, consciente que los momentos históricos que vivíen diben dexar unos cuantos sucesos más qu’añedir a esa llista, llarga yá. Un capítulu más nel afitamientu d’esa idea-fuercia –la llucha como identidá de la clas obrera–, foi la declaración de soberanía firmada en Xixón el 24 d’agostu de 1937.